இன்று பள்ளிகள் திறக்கப்பட்டுள்ளன. இன்னும் ஓரிரு நாட்களில் கல்லூரிகளும் திறக்கப்படும். கல்லூரி சேர்க்கை காலம் வந்துவிட்டால், பல நேரங்களில் மாணவர்களை விட பெற்றோர்களே அதிக உற்சாகத்துடனும் பெருமையுடனும் இருப்பதை காணலாம். ஆனால் இந்தக் காலகட்டத்தில் சில உண்மைகளை அமைதியாக புரிந்துகொள்வது அவசியம்.
தமிழகத்தில் பெரும்பாலான கல்லூரிகளில் பாடத்திட்டங்கள் ஒரே மாதிரியான அடிப்படையில் அமைந்துள்ளன. எந்தக் கல்லூரியில் சேர்ந்தாலும், மாணவர்கள் கற்பது ஒரே பாடம் தான். ஆனால் தாங்களாகவே படிக்கும் பழக்கத்தை வளர்த்துக்கொள்ள வேண்டும். வகுப்பறை கற்றலுடன் சேர்த்து நூலகப் பயன்பாடு, தனிப்பட்ட வாசிப்பு, சுய முயற்சி ஆகியவையே உயர்கல்வியின் உண்மையான அடித்தளங்கள்.
இன்றைய தேர்வு முறைகளும் பழைய காலத்தைப் போல கடினமானவை அல்ல. வகுப்புகளில் பங்கேற்பு, ஆய்வகப் பணிகள், திட்ட அறிக்கைகள் (Project), ஒப்படைப்புகள் (Assignments) ஆகியவற்றை முறையாகச் செய்தால், கட்டிடனமும் முறையாக கட்டி தேர்வு எழுதி விட்டால் பட்டப்படிப்பை வெற்றிகரமாக முடிக்க முடியும். ஆனால் கல்லூரி வாழ்க்கையை வெறும் பொழுதுபோக்கு, நிகழ்ச்சிகள், அமைப்புகள், குழுக்கள் போன்றவற்றில் மட்டுமே செலவழித்துவிட்டால், அது வேலைவாய்ப்பிற்கோ வாழ்க்கை முன்னேற்றத்திற்கோ பெரிய பலன் தராது.
பட்டப்படிப்பு படிக்கும் காலத்திலேயே அரசு வேலைத் தேர்வுகள், போட்டித் தேர்வுகள், தொழில்துறை திறன்கள் போன்றவற்றிற்கான தயாரிப்புகளைத் தொடங்குவது நல்லது. அடிப்படைப் பாட அறிவை புறக்கணித்துவிட்டு, பட்டப்படிப்பு முடிந்த பிறகு வேலைக்காக மட்டும் தயாராகத் தொடங்குவது பல நேரங்களில் சிரமத்தை ஏற்படுத்தும்.
கல்லூரிக்குச் செல்லும் மாணவர்கள் பல்வேறு உடைகள், அழகுசாதனப் பொருட்கள், இருசக்கர வாகனங்கள் போன்றவற்றைக் கோரலாம். ஆனால் பெற்றோர் முதன்மையாக ஒரு நல்ல @#கணினி அல்லது மடிக்கணினி வாங்கிக் கொடுப்பதைப் பற்றி சிந்திக்க வேண்டும். இன்றைய சூழலில் கணினி அறிவும் இணையவழி கற்றலும் சேர்ந்து இல்லாமல் பட்டப்படிப்பை முழுமையாகப் பயன்படுத்துவது கடினம்.
மேலும், கல்லூரி வாழ்க்கையின் ஆரம்பத்திலேயே காதல், மனஅழுத்தம், போதைப்பொருள் பழக்கம் போன்றவற்றால் சில மாணவர்கள் தங்கள் இலக்கிலிருந்து விலகிச் செல்கின்றனர். பெற்றோர் தங்கள் பிள்ளைகளுடன் தொடர்ந்து உரையாடி, கல்வியின் முக்கியத்துவத்தையும் குடும்பப் பொறுப்புகளையும் உணர்த்த வேண்டும்.
முன்னொரு காலத்தில் ஆசிரியர்கள் மாணவர்களுக்கு வாழ்க்கை வழிகாட்டுதல்களையும் வழங்கினர். இன்று பல காரணங்களால் மாணவர் ஆசிரியர் இடைவெளி கூடி உள்ளது. மணாவர்கள் மேல் அக்கறை எடுப்பதும் பல ஆசிரியர்கள் வேலையை துறக்கவும் சிலர் போக்சோ வழக்குகளை வர சந்தித்து வருகின்றனர். எனவே குடும்பங்களின் பங்கு இன்னும் அதிகரித்துள்ளது. பெற்றவர்கள் பிள்ளைகள் மேலுள்ள அக்கறை வலுப்படுத்த வேண்டும். கல்லூரி வகுப்புக்கு செல்லாமல் ஊர் சுற்றுகிறார்கள் என அறிந்தால் ஒரு வருடம் வேலைக்கு விட்டு மறு வருடம் கல்லுரிக்கு சேர்த்து விட்டால் பொறுப்பாக படிப்பார்கள்.
மாணவர்கள்: கல்லூரியில் உள்ள ஆசிரியர்கள், நண்பர்கள், மாணவர் அமைப்புகள் ஆகியவற்றுடன் பழகும்போது சமநிலையுடன் இருக்க வேண்டும். எந்தத் தனிப்பட்ட பிரச்சினையிலும் உணர்ச்சி வசப்படாமல், தங்கள் கல்வி இலக்கை முன்னிலைப்படுத்திக் கொள்ள வேண்டும்.
கல்லூரிகளில் மாணவர் ஆலோசனை மையங்கள் (Counselling Centres) அமைக்கப்பட்டிருக்கும். அவை மாணவர்களின் நலனுக்காகவே உருவாக்கப்பட்டவை. இருப்பினும், மாணவர்கள் தங்கள் தனிப்பட்ட மற்றும் குடும்ப விவகாரங்களை பகிரும் போது தேவையான விவேகத்தையும் எல்லைகளையும் கடைப்பிடிப்பது நல்லது.
குறிப்பாக பெற்றோர், தங்கள் மகன்களுக்கும் மகள்களுக்கும் கல்லூரி என்பது முதன்மையாக கல்வி கற்கும் இடம் என்பதை தொடர்ந்து நினைவூட்ட வேண்டும். சமூக வலைத்தளங்கள், reels போன்றவை பயன்படுத்த கட்டுபாடு இருக்க வேண்டும். பல பெண் பிள்ளைகள் reels மோகத்தில் பல தவறான வழியில் போவதை அவதானிக்கலாம்.
ஒவ்வொரு கல்லூரிக்கும் தனித்தனி கல்விச் சூழலும் நிர்வாக அணுகுமுறையும் இருக்கும். சில கல்லூரிகள் கல்வி, திறன் மேம்பாடு மற்றும் ஒழுக்கத்தை முதன்மையாகக் கொண்டு செயல்படுகின்றன. ஆனால் சில இடங்களில் மாணவர் வாழ்க்கையில் ஏற்படும் காதல், தனிப்பட்ட உறவுகள் மற்றும் பிற கவனச்சிதறல்களை மிகச் சாதாரணமாக எடுத்துக்கொள்வதோடு , நகைச்சுவையாகப் பேசுவதோ, அல்லது அவற்றை மறைமுகமாக ஊக்குவிப்பதோ போன்ற சூழல்கள் காணப்படலாம். பிரச்சினைகள் பெரிதாகும் வரை அவற்றை கண்டும் காணாதது போல இருந்து, பின்னர் பொறுப்பைத் தவிர்த்துக் கொள்வதும் நடக்கிறது. . அதன் விளைவுகளைச் சந்திப்பது பெரும்பாலும் மாணவர்களும் அவர்கள் பெற்றோர்கள் மட்டுமே. சில நேரங்களில் அது கல்வி இடைநிறுத்தம் அல்லது எதிர்கால வாய்ப்புகள் பாதிக்கப்படுவதற்கும் காரணமாகிறது.
மாணவர்கள் கல்லூரிக்குச் செல்வது கல்வி கற்கவும், திறன்களை வளர்த்துக்கொள்ளவும், எதிர்கால வாழ்க்கைக்குத் தயாராகவும் தான் என்பதை மறக்கக் கூடாது. காதல் அல்லது தனிப்பட்ட உறவுகள் என்பது ஒருவரின் தனிப்பட்ட வாழ்க்கையைச் சார்ந்த விஷயம்; அதற்காக கல்லூரிக்குச் செல்லவில்லை என்ற புரிதல் மாணவர்களிடம் இருக்க வேண்டும்.
மேலும், சில பெற்றோர்கள் அக்கறையால் "என் மகனை அல்லது மகளை நன்றாக கவனித்துக் கொள்ளுங்கள்" என்று ஆசிரியர்களிடம் அல்லது நிர்வாகத்திடம் மிகுந்த நெருக்கத்துடன் கூறுவார்கள். அன்பும் அக்கறையும் நல்லவைதான். ஆனால் அதே நேரத்தில், மாணவர்களின் தன்மானம், சுயமரியாதை மற்றும் தனிப்பட்ட எல்லைகள் பாதுகாக்கப்படுவதும் முக்கியம்.
கல்வி நிலையங்களில் பணிபுரியும் பெரும்பாலான ஆசிரியர்கள் மாணவர்களின் நலனுக்காக அர்ப்பணிப்புடன் செயல்படுகிறார்கள். இருப்பினும், எந்தத் துறையிலும் இருப்பது போல சில விதிவிலக்கான நபர்கள் தங்களது பொறுப்பின் எல்லைகளை மீறி நடந்து கொள்ளக்கூடும். அத்தகைய சூழல்கள் மாணவர்களின் மனநிலையையும் கல்விப் பயணத்தையும் பாதிக்கக்கூடும். எனவே பெற்றோர்களும் மாணவர்களும் விழிப்புணர்வுடன் இருந்து, தேவையான இடங்களில் மரியாதையுடனும் விவேகத்துடனும் எல்லைகளைப் பேணுவது நல்லது.
கல்லூரி வாழ்க்கை என்பது சுதந்திரத்தையும்
பொறுப்பையும் சமநிலைப்படுத்திக் கற்றுக்கொள்ளும் பருவம்.
கல்லூரி வாழ்க்கை என்பது வெறும் பட்டம் பெறுவதற்கான காலம் அல்ல. அது ஒருவரின் சிந்தனை, திறன், பொறுப்பு உணர்வு மற்றும் எதிர்காலத்தை வடிவமைக்கும் முக்கியமான பருவம். அந்த வாய்ப்பை மாணவர்களும் பெற்றோர்களும் சரியாகப் பயன்படுத்தினால், கல்வி உண்மையான முன்னேற்றத்திற்கான பாதையாக அமையும்.
Posts
