கனவினைப் போலொரு காலம்”- ஜவஹர் ஜி

 

கனவினைப் போலொரு காலம் – ஒரு நினைவுப் பயணத்தின் வாசிப்பு

நண்பர் ஜவஹர் ஜி எழுதிய “கனவினைப் போலொரு காலம்” என்ற இந்த நூல், ஒரு புகைப்படக் கலைஞனின் முப்பத்து நான்கு ஆண்டுகால அனுபவங்களின் நினைவுத் தொகுப்பாக வாசகர்களுக்கு முன் நிற்கிறது. 2026 ஜனவரியில் வேரல் பதிப்பகம் வெளியிட்ட இந்த நூல் 104 பக்கங்கள் கொண்டது. அட்டைப்பட வடிவமைப்பும், புத்தக அமைப்பும் வாசகனை ஈர்க்கும் வகையில் அமைந்துள்ளன.

நூலின் தொடக்கத்திலேயே ஆசிரியர் தனது புகைப்படக் கலைப் பயணத்தின் பின்புலத்தை பகிர்ந்து கொள்கிறார். இந்தக் கலையின் மீது அவருக்கு ஏற்பட்ட ஈர்ப்பு, தனது தந்தையிடமிருந்து வந்தது என்பதை அவர் உணர்ச்சியுடன் பதிவு செய்கிறார். நகைச்சுவை, சுவாரசியம், அனுபவம், மனிதநேயம் ஆகியவை கலந்த ஒரு பயணக் குறிப்பாக இந்த நூலை வாசிக்கலாம்.

மொத்தம் பதினாறு பகிர்வுகளை உள்ளடக்கிய இந்த நூல், ஒரு புகைப்படக் கலைஞனின் வாழ்க்கை அனுபவங்களையும் நினைவுகளையும் பதிவு செய்துள்ள சிறு சிறு கதைகளின் தொகுப்பாக அமைகிறது. முதல் கதையிலேயே வாழ்க்கையின் நிலையற்ற தன்மையை உணர்த்தும் சம்பவம் இடம்பெறுகிறது. அவர் எடுத்த முதல் புகைப்படத்தை கொடுக்கச் செல்லும் போது அந்த நபர் இறந்துவிட்டார் என்ற செய்தி வெளிப்படுவது, வாழ்க்கையின் எதிர்பாராத திருப்பங்களை நினைவூட்டுகிறது.

நூலின் பல இடங்களில் நகைச்சுவையும் சுவாரசியமும் கலந்துள்ளன. குறிப்பாக உதவியாளரின் குடிப்பழக்கம், ஆண்களின் குடி கலாசாரம் போன்றவை சிரிப்பைத் தூண்டும் விதமாக எழுதப்பட்டுள்ளன. இருப்பினும், கலைஞர்களுக்கும் குடிக்கும் உள்ள தொடர்பு குறித்து வாசகனை சிந்திக்க வைக்கும் ஒரு நிலை இக்கதைகளில் ஒலிக்கிறது.

கிராமப்புறங்களில் புகைப்படம் எடுக்கச் செல்லும் போது ஏற்படும் சிரமங்கள், வசதியின்மை, இயற்கை உபாதைகள் போன்ற அனுபவங்களும் உயிரோட்டமாக விவரிக்கப்படுகின்றன. அதே சமயம், புகைப்படக் கலைஞர்கள் தங்கள் தொழில் நிமித்தம்  செல்லும் இடங்களில் உள்ள சமூகப் பின்னணிகளை ஜாதி, மதம், பண்பாடு போன்றவற்றை அறிந்து கொள்ள வேண்டிய அவசியத்தையும் ஆசிரியர் நயமாகக் குறிப்பிட்டுள்ளார்.

திருமண வீடுகளில் நடந்த சம்பவங்கள் இந்த நூலின் முக்கியமான பகுதியாக உள்ளன. திருமண மண்டபத்தில் தங்க வேண்டிய அவல நிலைகள்,  கல்யாணங்களில் ஏற்பட்ட சண்டைகள், அதில் புகைப்படக் குழுவினரின் பங்கு போன்றவை நகைச்சுவைத் தன்மையுடனும் சமூகப் பார்வையுடனும் பதிவு செய்யப்பட்டுள்ளன. சம்பவங்களை மட்டும் அல்லாமல், அந்த இடங்களின் பண்பாடு, பழக்க வழக்கங்கள் ஆகியவற்றையும் ஆசிரியர் கதைகளின் வழியாக வாசகர்களுக்கு அறிமுகப்படுத்துகிறார்.

ஏழை வீட்டுக் கல்யாணத்திற்கு சென்ற அனுபவம் மனதைத் தொடும் வகையில் உள்ளது. அந்த வீட்டின் தேவைக்காக தனது காரையே பயன்படுத்த அனுமதிக்கும் புகைப்படக் கலைஞனின் செயலில் மனிதநேயத்தின் ஒரு மெல்லிய ஒளியாக உள்ளது.

அதேபோல் தூத்துக்குடியில் நடந்த ஒரு திருமண நிகழ்வில் தாமதமாகச் சென்று, அரைகுறையாகவே படம் பிடிக்க வேண்டிய நிலை உருவாகிறது. மணவீட்டிற்கு தேவையான பூமாலை வாங்கி வருவது கூட புகைப்படக் கலைஞனின் பொறுப்பாக மாறும் சூழலை ஆசிரியர் சுவாரசியமாக விவரிக்கிறார்.

சுனாமி சம்பவங்களை படம் பிடித்த அனுபவமும் நூலில் இடம் பெற்றுள்ளது. அந்த பகுதி இன்னும் விரிவாக எழுதப்பட்டிருக்கலாம் என்று  தோன்றுகிறது. இருப்பினும்  அந்த அனுபவத்தின் தாக்கம் வாசகனை சற்று நேரம் சிந்திக்க வைக்கிறது..

இன்றைய திருமண நிகழ்வுகளின் மாற்றங்கள், தலைமுறைப் பார்வையின் வேறுபாடுகள் ஆகியவையும் இந்த நூலில் வெளிப்படுகின்றன. சமூக மாற்றங்களின் ஒளிச்சாயல்கள் இக்குறிப்புகளில் தென்படுகின்றன. சில சம்பவங்கள் சிரிப்பைத் தருகின்றன; சிலவை சிந்தனையைத் தூண்கிறது.

இந்த நூலின் முக்கிய வலிமை அதன் மனிதநேயத் தொனியே ஆகும். புகைப்படக் கலைஞன் வெறும் ஒளிப்பதிவாளராக மட்டுமல்லாமல், சில நேரங்களில் ஒரு சாட்சியாளராகவும், சில சமயங்களில் ஒரு செய்தியாளராகவும் மாற வேண்டிய சூழலை ஆசிரியர் பதிவு செய்கிறார். “பித்து நிலையில் சஞ்சரிப்பவனே கலைஞன்” என்ற அவரது கருத்து கலைஞனின் உள் மன உலகை வெளிப்படுத்துகிறது.

புகைப்படக் கருவிகளில் ஏற்பட்ட தொழில்நுட்ப மாற்றங்களையும், அவற்றை கற்றுக்கொள்ள அவர் எடுத்த முயற்சிகளையும் ஆசிரியர் பகிர்ந்துள்ளார். பயிற்சி வகுப்புகளில் கலந்து கொண்டு தன்னை மேம்படுத்திக் கொண்ட அனுபவங்களும் இதில் இடம்பெறுகின்றன.அங்கு சந்தித்த தியானத்தில்  ஈடுபாடு கொண்ட வினோதன் என்ற நபரின் வினோத குணத்தையும் அவர் விமர்சித்து திருத்த முயல்கிறார். எப்போதும் போல, கதையை முடிவில் குடியுடன் செய்கிறார்.

மொத்தத்தில் “கனவினைப் போலொரு காலம்” என்பது ஒரு புகைப்படக் கலைஞனின் அனுபவங்களைக் கூறும் நூலாக மட்டுமல்ல; மனிதர்களின் வாழ்க்கைச் சுவடுகளை பதிவு செய்யும் ஒரு நினைவுப் பயணமாகவும் வாசிக்கப்படுகிறது. சுவாரசியம், நகைச்சுவை, சிந்தனை, மனிதநேயம்—இவை அனைத்தையும் இணைத்துக் கொண்ட ஒரு அனுபவ நூலாக இது வாசகர்களின் நினைவில் நிலைத்து நிற்கும். புகைப்படக்கருவியை தொழிலாகவோ பொழுதுபோக்காகவோ எடுக்கும் நபர்களுக்கு இப்புத்தகம் ஒரு வழிகாட்டியாக இருக்கும் என்பதில் சந்தேகமில்லை.